4 dumondas a Scuol Chantun Grischun
4 dumondas a Scuol Chantun Grischun
Che fa gnir unic a Scuol?
Aita Zanetti, capo cumünal: Scuol es daspö la fusiun dal 2015 il cumün culla plü gronda surfatscha da la Svizra e cunfina cun l’Austria e cun l’Italia. Üna part dal territori cumünal fa part dal Parc Naziunal Svizzer e pro no naschan bleras funtanas d’aua minerala. Scuol es implü ün center regiunal important.
Chenün es stat l’ultim proget cha Scuol ha realisà cun success?
D’incuort ha approvà la populaziun üna revisiun parziala da la planisaziun locala chi permettarà la fabrica d’ün hotel plü grond a Ftan. Ultra da quai realisaina ün nouv plan d’inglüminaziun illas differentas fracziuns dal cumün.
Che sun las plü grondas sfidas i’ls prossems tschinch ons?
La revisiun totala da la planisaziun locala ans occuparà. I’s tratta da realisar la LPT1 incl. dezonaziuns, quai chi’d es dolurus per ün cumün cun quotas d’allogi uschè bassas. Dal rest am preoccupa la demografia: Nossa populaziun vain adüna plü veglia e la part da persunas giuvnas tschessa. Üna buna misculanza d’età es però importanta per la vita i’ls cumüns.
Sch’Ella nu vivess fingià in Seis cumün, perchè gniss’La a star qua?
No vain üna sporta culturala vivainta, ün provedimaint da sandà chi funcziuna fich bain ed üna vita da cumün intacta illas diversas fracziuns. E natüralmaing la bellischma natüra in Engiadina Bassa.
POPULAZIUN
4774
SURFATSCHA
438.77 km2
OTEZZA
1099 – 3312 msm
LINGUA UFFICIALA
Rumantsch
PÈ D’IMPOSTAS
100% da l’imposta chantunala simpla
PLAZZAS A TEMP CUMPLAIN ADMINISTRAZIUN CUMÜNALA
24
EXECUTIVA
suprastanza cumünala, 7 commembers
LEGISLATIVA
radunanza cumünala e votaziun a l’urna
«Il turissem es üna pozza importanta, al medem temp sun nos cumüns vivaints perquai chi s’ha chüra l’ün da l’oter»
Aita Zanetti es daspö il 2019 illa suprastanza cumünala da Scuol e daspö il 2023 capo cumünal. Implü politisesch’la davent dal 2018 i’l Grond Cussagl dal chantun Grischun ed es statta dal 2021/22 presidenta dal Grond Cussagl. Ella ha passantà l’infanzia a Sent chi’d es hoz üna part dal cumün da Scuol e maina là cun sia famiglia üna pauraria biologica. Ella ha tschernü ad Eschenbach (SG) sco prossem cumün chi vain purtretà.
